ကွမ်းပြတ်သွားတဲ့ ဖွားဖွား

"(ဟားး)))))))))))))"
"ဟဲ့ ညလေး ဘာလို့ ဒီလောက်တောင် သဘောကျနေရတာလဲ" (သူဇာ)
"ဟီး ရီချင်လို့ပါဟ တွေးလေ တွေးလေ ရီချင်လေပဲ ဟီးးးး"
"ဟာ မေးတာဖြေဦးလေ စွတ်ရီနေတယ် တော်ကြာ အူတွေ ထွက်ကျလာဦးမယ်" (ငယ်မ)
"ဟိ ပြောပါမယ်ဟ ပြောချင်လို့လဲ နင်တို့ကို စောင့်နေတာ ဟီးးးးး"
"ဟဲ့ နင်ရူးသွားပြီလား နရဲ ကြည့်ပါဦး ညလေး ရူးပြီလားမသိ တရီထဲရီနေတယ်" (ငယ်မ)
"ဟုတ်မယ်ဟ ကြည့်ပါလား စကားတောင် ပြန်မပြောနိုင်ဘူး ဗိုက်နှိပ်ပြီး ရီနေတာ လာ သူ့အမေ သွားပြောရအောင်ဟာ" (နရဲ)
"ဟာ မရူးပါဘူးဟ နင်တို့ကလဲ ငါပြောပြီးရင် နင်တို့လဲ ငါ့လိုပဲ ရီကြမှာ ဟိ"
"ပြောဟာ ရီချင်ပြီ"
"ငါ့အဖွားလေ သိတယ်မဟုတ်လား"
"အေးလေ သိသားပဲ ဘာလဲ မှောက်ရက်လဲလို့လား"
"ဟာ မှောက်ရက်လဲရင် ငါဒီလိုရီမလား ငိုနေမှာပေါ့ ခုဟာက"
"သြော် ကဲ ညလေး ငါ လုံးဝ စိတ်မရှည်တော့ဘူး နာရီဝက်လောက်ရှိပြီ မေးနေတာ လိုရင်းကို မရောက်တော့ဘူး" (သူဇာ)
"နင်တို့ကလဲနော် ငါက ဘယ်ကစပြောရမလဲ စဉ်းစားနေတာပါ"
"ဘယ်က စ ပြောပြောဟာ ပြောလိုက် မရစ်နဲ့တော့" (နရဲ)
"ဒီလိုဟ ဟိ ဟိ"
*****
ညလေး အဖွားက ကွမ်းကို တအားစားတာ။ ဘယ်လောက်တောင် စားလဲဆိုရင် နှုတ်ခမ်း ထောင့်စွန်းတွေတောင် ကွမ်းသွေးတွေ ပေနေတာ ပြန်ချွတ်မရတော့ဘူးလေ။ ထမင်းစားပြီးလဲစား၊ မစားခင်လဲစား၊ တစ်နေ့လုံးစားတာ ညအိပ်ရင်တောင်မှ ကွမ်းဗူးကို အိပ်ယာဘေး ထားအိပ်တာလေ တစ်ရေးနိုးရင်လဲ မျက်လုံးမဖွင့်ပဲ လက်နဲ့စမ်း ယူပြီး ပါးစပ်ထဲ ငုံထားတာ။ အဲ့လောက်တောင် ကြိုက်တယ်။ ဘယ်သူပြောပြော ဘယ်သူတားတား လုံးဝကိုမရဘူး။
"ဟဲ့ ငါ့မှာ ဒါလေးပဲ အပျင်းပြေစရာရှိတယ်၊ နင်တို့ကို ထိခိုက်နေလို့လား၊ ငါကြိုက်တာလေး လုပ်တာပဲ နင်တို့က လိုက်တားမြစ်နေကြတယ်"
ဆိုပြီး ပြောတော့လဲ ဘယ်သူမှ မတားကြတော့ဘူးလေ။ ပြောမရတော့လဲ ဒီတိုင်းကြည့်နေကြတာပေါ့။
ဟုတ်ပါတယ် အိမ်ရှိတဲ့ လူကုန် အလုပ်သွား၊ ကျောင်းတက်ကြတဲ့ခါ အဖွားက အိမ်မှာ တစ်ယောက်တည်း ကျန်ခဲ့ရတာဆိုတော့ ပုတီးစိပ်၊ ဘုရားခန်းဝင်ရင်ဝင် မ၀င်ရင်လဲ ထိုင်ပြီး ကွမ်းမြုံ့နေတော့တာ။

"အဖွား ကွမ်းအရမ်းကြိုက်လား"
"ကြိုက်တာပေါ့ ငါ့မြေးရဲ့ ဘာလို့လဲ"
"ဟင် အဖွားကလဲ ဘာအရသာရှိလို့လဲ၊ ပါးစပ်လဲ မလှတော့ဘူး ကွမ်းသွေးတွေ ပေနေတယ်၊ သွားတွေမှာရောပဲ၊ ပြီးတော့ ကွမ်းစားရင် သွားဖုံးတွေ၊ လျှာတွေမှာ အနာတွေ ပေါက်တတ်တယ်တဲ့"
"အပျင်းပြေတယ် မြေးမရဲ့၊ ဒါတွေ မြေးဘယ်သူပြောတုန်း"
"ဖွားကလဲ အပျင်းပဲပြေတာ ဘာကောင်းလို့လဲ၊ တီဗွီမှာ ကျန်းမာရေးအတွက် လွှင့်ရင် ဒေါက်တာတွေ ပြောနေတာ တွေ့ရတာပဲကို"
"ကဲ မြေးကို ရှင်းမပြတတ်တော့ဘူး သွား ကိုယ့်ဖာသာ သွားဆော့ချည်တော့"
"အင်း ဖွားတစ်ယောက် ကွမ်း မြန်မြန် ပြတ်ပါစေလို့ မြေးတော့ ဘုရားမှာပဲ ဆုတောင်းနေတော့မယ်၊ ဟွန့် ကွမ်းစားတာ မြေး မကြိုက်ဘူးဆိုမှ တစ်နေ့တစ်လေတောင် မစားပဲ မနေဘူး"
ညလေးလဲ ပြောမရတဲ့ ဖွားနားကနေ ခြေစောင့် ထွက်ခဲ့လိုက်တယ်လေ။

ဒီလိုနဲ့ တစ်နေ့ အဲ့ဒီနေ့ပေါ့ ဖွားကို ကွမ်းပြတ်စေခဲ့တဲ့နေ့လေ ညလေး မမေ့တော့ဘူး ဟိ ရီလဲ ရီရတယ် မဟုတ်လား တွေးလေ ရီချင်လေနဲ့ တစ်အိမ်လုံးလဲ အဖွားကို စလို့ မဆုံးကြတော့ဘူးလေ။ အဖြစ်က ဒီလို

ဖွားက ခါတိုင်းလိုပဲ ညနေ အိမ်သားတွေနဲ့ ထမင်းစားပြီး တီဗွီခဏထိုင်ကြည့်ရင်း စကားပြောကြ ဘုရားခန်းဝင် ၀တ်ပြုပြီး အိပ်ယာ ၀င်ခဲ့ကြတာပေါ့။ မနက်ကို ညလေးလဲ ခါတိုင်းလိုပဲ အဖွားခန်းသွား ပြတင်းတံခါးတွေ ဘာတွေဖွင့် အဖွားကို နှိုးလဲပြီးရော ထုံးစံအတိုင်း ညတုန်းက ယူငုံထားတဲ့ ကွမ်းကို ပါးစောင်ထဲက ထုတ်ပြီး ထွေးခံမှာ ထွေးတာပေါ့။ ဒီမှာပဲ ဟိ
"ဟင် အဖွား ဒီဟာ ဘာကြီးတုန်း ဖြူဖြူကြီး"
"ဘာလဲမြေးမရဲ့ ဖွားဘယ်သိမလဲ"
"အင် ဖွား ပါးစပ်ထဲက ထွက်လာတာပဲလေ၊ ခုပဲ ဖွားထွေးထုတ်လိုက်တာ"
"ဟုတ်လား ဟုတ်လား ပြစမ်းပါဦး၊ ဟဲ့ နေဦး ငါ့ကို မျက်မှန်ပေးဦး"
ဖွားက မျက်စိမှုန်နေပြီလေ ပါဝါမှ များကြီးပဲ မျက်မှန်မပါရင် အကုန်လုံး ၀ါးတားတားပဲ ကောင်းကောင်း မမြင်ရဘူး၊ မျက်စိခွဲပါ ဆိုတော့လဲ ခွဲချင်ဘူးတဲ့ အသက်ကြီးပြီလေ ဆိုပြီး ပြောမရပြန်ဘူး (အဲ့လိုမျိုး ခေါင်းမာတဲ့ ဖွား)။

"ဟုတ်ပ ဖြူဖြူတုံးကြီး ငါလဲ သတိမထားမိပါဘူးအေ"
"ဖွား ဒီဟာတွေကရော ဘာတွေလဲ"
ကျမလဲ ဟိုဒီလျှောက်ကြည့်ရင်း ဖွားရဲ့ ခုတင်ဘေး စားပွဲခုံပေါ်မှာ တင်ထားတဲ့ ကွမ်းအစ်ဘေးနားက ပန်းကန်ပြားထဲမှာ အမွှေးလိုလို သွေးစတွေနဲ့ တွေ့လိုက်တော့
"ဖွား ညတုန်းက ငရွှေကြီး ၀င်သေးလား"
"အေး ၀င်တယ် ထင်တယ် အသံတော့ကြားလိုက်တယ်၊ ဖွားလဲ သတိမထားမိလိုက်ပါဘူး"
"ဒါဆိုရင် သေချာပြီ၊ ဟားးးဟားးးး ဖွားကတော့ဖြစ်ရမယ်၊ ဖွား ထွေးထုတ်ထားတာ ကြွက်ခေါင်းကြီး၊ ငရွှေက ကြွက်ဖမ်းလာပြီး ဖွားအခန်းထဲက စားပွဲခုံပေါ် တင်စားပြီး ကျန်နေရစ်တဲ့ ကြွက်ခေါင်းကြီးကို ဖွားက ကွမ်းအမှတ်နဲ့ တစ်ညလုံး ငုံထားတာပေါ့ ဝေါ့၊ ပြောရင်းနဲ့ အန်ချင်လာပြီ ဝေါ့"
"ဟဲ့ ဟုတ်ရဲ့လား မိညလေးရယ် ခု နင်ပြောတာနဲ့တင် ငါ့မှာ အန်ချင်လာတယ်"
"ဟုတ်ပ ဖေ၊ မေ၊ ကိုကိုရေ လာကြပါဦး ဒီမှာ ဖွားဖွား ကြွက်ခေါင်းကြီးကို ကွမ်းအမှတ်နဲ့ တစ်ညလုံးငုံထားတာ ဖြူဖွေးနေပြီ"
"ဟဲ့ မြေးမ မအော်နဲ့လေ မပြောနဲ့လေ ဝေါ့"
ဖွားလဲ ပြောပြောဆိုဆို ရေချိုးခန်းထဲသွားပြီး အန်ပါတော့တယ်။ ညလေးလဲ တစ်အိမ်လုံးကို လှည့်ပတ်ပြောရင်း အဲ့ဒီနေ့ တစ်မနက် ဖွားအခန်းထဲ လူတွေ ပြည့်သွားပါတော့တယ်။ ဖွားဆို တစ်နေ့လုံး တစ်ဝေါ့ဝေါ့နဲ့ အန်လို့မဆုံးတော့ဘူး ဘာမှလဲ ကောင်းကောင်း မစားတော့ဘူးလေ။

အဲ့ဒီနေ့ကစလို့ ဖွားက ကွမ်းဆို အသံတောင် မကြားချင်တော့ဘူး ဖြစ်သွားတာ ဒီနေ့ထိ တကယ် လုံးဝကို မတို့တော့ဘူးလေ။ တစ်ပါတ်လောက်တော့ အစားအသောက် ပျက်လိုက်တာပေါ့။ ဟိ ဒါပေမယ့် အားလုံးက အဲ့ဒီအဖြစ်အပျက်ကိုပဲ ကျေးဇူးတင်နေတာ။ ဖွားကိုလဲ အဲ့ဒါနဲ့ ပတ်သတ်ပြီး စလို့နောက်လို့ ကောင်းနေကြတာ အားလုံးက ချစ်ကြတော့ တစ်ပါတ်လောက်လဲ ဆေးခန်းကို သွားလိုက်လာလိုက် လုပ်ပြီး ရောဂါ ဖြစ်မဖြစ်လဲ စစ်ဆေးရသေးတယ်လေ။ ဘာပဲဖြစ်ဖြစ် ပျော်စရာ ကျေးဇူးတင်စရာ အဖြစ်အပျက်လေးပါ။ အမှတ်တရပေါ့။
*****
"ဟားးး ဟားးးးး ဟားးးးးးးး ဖြစ်ရမယ် ညလေး ဖွားဖွားလို့မပြောရဘူး ဖြစ်လိုက်ရင် အရာရာနဲ့ အကြောင်းကြောင်းချည်းပဲ၊ နင်ပြောတာ နားထောင်ရင်း ငါတောင် အန်ချင်လာတယ်၊ ငါသာဆိုရင် ဝေါ့" (နရဲကောင်ရဲ့ မှတ်ချက်)
"ဟုတ်ပ ငါသာဆိုရင်လို့ တွေးလိုက်တိုင်း လှိုက်လှိုက်တက်လာတဲ့ ရွံရှာမှုကတော့ မပြောတတ်တော့ဘူး ဟ" (ဒါကတော့ ငယ်မလေ)
"အေးဟ နင်ရဲ့ အဖွားပဲကိုနော" (သူဇာပေါ့ လေသံကိုက)
*****
သူငယ်ချင်းတို့ရေ ဒီလို ဒီလို ဖြစ်ပျက်ခဲ့တယ်လို့ တကယ် မမှတ်ကြပါနဲ့နော်။ ဒါက ဖတ်ခဲ့ရတဲ့ ၀တ္ထုတစ်ပုဒ်ထဲက အကြောင်းအရာ တစ်ခုပါ။ ဒါပေမယ့် တကယ်ကိုပဲ "ငါသာဆိုရင်" ဆိုပြီး တွေးလိုက်တိုင်း အန်ချင်လာပါတယ်။ ဝေါ့........
*****
ကွမ်းစားတာကို တအားမုန်းပါတယ်။ ပြီးတော့ ကွမ်းတံတွေးတွေ ဟိုဒီလျှောက်ထွေးတာ ပိုကြည့်မရပါဘူး။ နေရာအနှံ့ ညစ်ပတ်နေရင် အဲ့ဒီလူကို ရှုံ့ချချင်ပါတယ်။ ပါတ်ဝန်းကျင် ညစ်ပတ်ယုံမက လူကိုပါ ကျန်းမာရေး ထိခိုက်စေနိုင်တဲ့ အစားအသောက်ကို ခုံမင်နှစ်သက်စွာ စားသုံးနေကြတဲ့ သူများကို ဒီပို့စ်ပေးဖတ်ချင်ပါတယ်။ ကိုယ့်အတွက် ဒီတစ်ခုက ဘာကောင်းကျိုးပေးနိုင်မလဲ ဘာဆိုးကျိုးတွေ သက်ရောက်စေလဲဆိုတာ သေချာ သုံးသပ်ပြီးမှ သုံးစွဲ စားသောက်ကြစေလိုပါတယ်။

သူငယ်ချင်းများ ကျန်းမာသန့်ရှင်း ရောဂါကင်းဝေးကြပါစေ နော်.....
*****
ဒါက ပို့စ်အဟောင်းလေးပါ ပြန်တင်ထားတာပါ။

*****