ဖြစ်ပုံက

သူများတွေ Blog စလုပ်တုန်းကတော့ ဘယ်လိုနေလဲ မသိဘူး၊ ညလေးလဲ Blog လုပ်ရော ဘယ်လိုပြောရမလဲ အနည်းငယ် သိထား၊ တတ်ထားတာ လေးတွေတောင် ခေါင်းထဲက ပျောက်ကုန်တယ်။

အလုပ်က အိမ်ပြန်လာရင် ခဏနားပြီး ရေချိုး၊ ထမင်းစား သောက်ပြီးတာနဲ့ ကိုယ့် အခန်းလေးထဲဝင် အင်တာနက် စတက်တော့တာပဲ။ အင်တာနက်က မကြည့်ရ၊ မ၀င်ရ မနေနိုင်အောင်ကို ဆွဲဆောင် နိုင်တယ်လေ။ နက်ပေါ်တက် လိုချင်တာတွေ Download လုပ်၊ ပြီးရင် ဖိုရမ်မှာ နည်းနည်းပါးပါး ၀င်ရေး၊ သူငယ်ချင်းတွေ မေးထားတာတွေ လိုက်ဖြေ ဒါလောက်ပါပဲ။
*****
နောက်တော့ ဘယ်က ဘယ်လိုစလို့ "ဘလော့ဂ်" ဆိုတာကြီး တွေ့သွားလဲမသိ၊ ဘယ်သူ့ ဘလော့ဂ်ထဲကို ရောက်သွားမှန်း မမှတ်မိတော့ဘူး။ သူ ရေးထားတာ လေးတွေ ဖတ်၊ သူပေးထားတဲ့ လင့်ခ်လေးတွေကို လိုက်ဝင်ရင်း သဘောကျစ ပြုလာတယ်။ သူတို့လေးတွေ ရေးထားတာက ကောင်းနေတာကိုး။ တယောက် တမျိုး မရိုးနိုင်အောင် တင်ပြနိုင်ကြတယ်၊ ပုံစံလေးတွေလဲ အပြိုင်အဆိုင်ပါပဲ။ သူ့ထက်ငါ အပြိုင် ကြဲနေကြတာက အရောင် စုံလင်လှတဲ့ ပန်းခင်းလေးထဲကို ၀င်လိုက်ရသလိုပဲ ရှုမငြီးစရာ ဖြစ်နေတာပေါ့။ မဖတ်ရ၊ ၀င်မကြည့်ရ မနေနိုင်တဲ့ ဘလော့ဂ် လေးတွေလဲ ရှိပါ့။ ဒါနဲ့ ညလေးလဲ ရေးချင်လာတယ်၊ ညလေး သုတ၊ ရသ နဲ့ သိထားတာလေးတွေကို ပြန်ဝေမျှချင်လာတယ်။

ညလေးရေးရင် သူတို့လောက် ကောင်းပါ့မလား၊ ငါရော သူတို့လောက် လုပ်တတ်ပါ့မလား ဆိုတဲ့ စိတ်နဲ့ မစရဲသေးတာ။ နောက်ပြီး ဘလော့ဂ်ဆိုတာ ကိုယ့်ရဲ့ မူပိုင်၊ ကိုယ်ပိုင်တာ ဆိုပေမယ့် သူငယ်ချင်းတွေ လင့်ခ်ပေးလိုက်ပြီးမှ ကိုယ်က ပုံမှန်လေးတောင်မှ မတင်နိုင်မှာ စိုးလို့ရယ်၊ ၀င်ကြည့်နေကြတဲ့ သူတွေက တခါလာ ဒါပဲ နောက်တခါလာလဲ ဒါပဲ ဆိုတာမျိုးကြီး မဖြစ်စေချင်တာရယ်၊ အချိန် မလောက်တာရယ်၊ ဘာရေးရမှန်း မသိသေးတာရယ်၊ ဒီလိုမျိုး "ရယ်" ပေါင်းများသွားလို့ (အဓိက ကတော့ ပျင်းလို့ပါပဲ၊ ဟဲ)။ မလုပ်ဖြစ်တာ။ ညလေးက စာရေးရမှာ တအားပျင်းတာ၊ စာရိုက်မလား ဆိုရင်တော့ ဘယ်နှစ်ရွက်လာလာ၊ ဘယ်နှစ်မျက်နှာ ပေးပေး ပြီးအောင် ရိုက်ပေးမယ်။ စာတော့ လာမရေးခိုင်းနဲ့ ဆိုတဲ့ လူမျိုး။

ဒီလိုနဲ့ တစ်နေ့တော့ အလုပ်က ပြန်လို့ ခါတိုင်းလိုပဲ လုပ်စရာ ရှိတာလေးတွေ လုပ်ပြီး ကွန်ပျူတာလေးဖွင့်၊ အင်တာနက် တက်တော့ အရင်လိုပဲ လိုချင်တာရှာယူ၊ ဖိုရမ်ဝင်ရေးရင်းနဲ့ သတိရသွားတာက "Blog" လုပ်ထားမယ်ကွာလို့။ ရေးတာမရေးတာ အပထား၊ သူများတွေကို လင့်ခ် ပေးတာမပေးတာလဲ အပထားလို့ ကိုယ် ဘယ်လောက်သိလဲ ဆိုတာကို စမ်းသပ်ကြည့်မယ် ဆိုပြီး Create Blog နဲ့ စလိုက်တယ်၊ ပြီးတော့ သူပေးတဲ့ အဆင့်တွေ အကုန်လုံးကို အစဉ်တိုင်း လုပ်တယ်။ နောက်တော့ ပို့စ်တင်ဆိုတော့ Starting Post လေး တစ်ကြောင်းရိုက်ပြီး စလိုက်တယ်။ Post ကို Publish လဲလုပ်ရော Error ဆိုတာ တက်လာပါတယ်၊ ပြီးတော့ တင်မရဘူးတဲ့၊ ဒါနဲ့ Back ပြန်သွားတယ် Post ပြန်တင်တယ်၊ Publish ပြန်လုပ်တော့ ရသွားပါတယ်။ ဒါနဲ့ ညလေးလဲ View ခေါ်ကြည့်တာပေါ့။ အင်း အဆင်ပြေပါတယ်။ ဘာမှမရှိသေးတာပဲ ရှိတယ်လေ။ ညလေးကလဲ နဲနဲ ရှည်လိုက်ရမှလေ သူပေးထားတဲ့ အတိုင်းမထားဘူး၊ Template တွေကို လိုက်ပြင် လိုက်သေးတယ်၊ မြန်မာလိုပေါ်အောင်လဲ လိုက်ရေးပေးတယ်။ ခဏနေတော့ လုပ်စရာက ပေါ်လာရော၊ ဒါနဲ့ Sign Out နဲ့ ထွက်ပြီး အလုပ် ခဏလုပ်တယ်။

ပြီးတော့ ပြန်လဲဝင်ရော သူက User Name နဲ့ Password မတူလို့ ၀င်မရပါဘူးတဲ့၊ "ဟင် ငါ ခုနကပဲ လုပ်ထားတာ ဘာကိစ္စ မေ့ရမှာတုန်း မှန်ပါတယ်ပေါ့" ဒါနဲ့ မကျေနပ်ဘူး Mail နဲ့ ၀င်လဲ မရပါဘူး "Blog" ကို A sign လုပ်လို့တောင် မရဘူး ၀င်လိုက်တာနဲ့ အသစ်ပဲစပါ သင်ပေးတာ မှားနေတယ်တဲ့။ တင်းသွားတာပေါ့။ အကုန်လုံးလဲ ပြင်ပြီးနေပြီ၊ စာတွေကို အသင့် Post လုပ်ယုံပဲ ကျန်တော့တာ ဥစ္စာ။ ဒီတော့ Password မေ့သွားလို့ဆိုပြီး Mail ပို့ခိုင်းတယ် (ဘိုးတော်က ပြန်မပို့ပါဘူး)။ ဒါနဲ့ပဲ နောက်ထပ်တစ်ခု ထပ်ယူတယ်၊ အဆင့်သုံးဆင့် ကျော်သွားတယ်။ Post ထပ်တင်တယ် Error ထပ်တက်တယ်၊ နောက်ပြန်ဆုတ်တယ်၊ ပြန်တင်တယ်၊ ရသွားတယ်။ Dashboard သွားကြည့်တော့ ပထမ လုပ်ထားတဲ့ တခုက ရှိနေတယ်လေ၊ ဒါနဲ့ အရင်ဟာကိုယူ ခုဟာကိုဖျက်ပြီးတော့ ပြီးပြီပေါ့။ ဒါနဲ့ ထွက်လိုက်ပြန်တယ် ပြန်ဝင်တယ်၊ ၀င်မရတော့ပြန်ဘူး။ ကဲ ဒီလောက်ဖြစ်လှတာ ထပ်ယူတယ်ဟာ ဆိုပြီး အသစ်ယူတယ်၊ ဒီလိုပဲလေ ထပ်ဖြစ်တယ်။ ဒေါသလဲ ထွက်လာတယ်၊ နင်မပေးမချင်း ယူတယ်ဟာ (ဘာဖြစ်လဲနော့ ပိုက်ဆံမှ မပေးရတာ) ဆိုပြီး အသစ်တွေ ထပ်ဖွင့်ရင်းနဲ့ ဘလော့ခ်က ၇ ခုလောက် ဖြစ်သွားတယ်။ အဟဲ လန့်မသွားနဲ့နော်။

ဒါနဲ့ စိတ်ပျက်ပြီးတော့ အရင်လိုပဲ အင်တာနက်တက် လိုချင်တာယူနဲ့ "လူမှန် အင်တာနက်မှန်" ပြန်ဖြစ် သွားတယ်လေ။ ဘလော့ဂ်ကို စိတ်ကုန်သွားလား ဆိုတော့ မကုန်သေးပါဘူး အချိန်ရတိုင်း ၀င်ကြည့်တယ် ဘယ်လိုမှ ၀င်မရပါဘူး။ ဘလော့ဂ် လုပ်ရင် တင်ဖို့ဆိုပြီး ရေးထားတာတွေလဲ လက်စ မသတ်ရသေးဘူး၊ နောက် ရမှပဲ ပြန်ရေးတော့မယ် ဆိုပြီး ဒီတိုင်း ပြစ်ထားလိုက်တယ်။

နောက်တော့မှပဲ IE ကြောင့်မှန်း သိတော့တယ်၊ IE Error ကိုး။ ခုတော့လဲ Fire Fox နဲ့ အဆင်ပြေနေပါတယ် (ခုတော့ ကျမသိပြီပေါ့)။
*****
အဲ ဖြစ်ပုံကို စလိုက်တာ တော်တော်လေးလဲ ရှည်သွားပြီ၊ ဖတ်ရတဲ့သူတွေလဲ တော်လောက်ပီလို့ အော်ကြတော့မယ်။ ဒါကတော့ "ညလေးရဲ့ဖြစ်ပုံ" လို့ ခေါင်းစဉ်တပ်လို့ ရအောင်ကို ဖြစ်သွားတဲ့ ကိစ္စပါ။

*****