NyAlAy

Apr 27, 2008

လူထဲကလူ

ငါက လူထဲက လူတစ်ယောက်ပေါ့
အများသူငါလိုပါပဲ
အသားဆိုင်လုံးလုံးကြီးပေါ်မှာ
ဆံပင်ဆိုတဲ့
မည်းမည်းအမျှင် ရှည်ရှည်တွေ
ပေါက်နေတယ်လေ။

ဟို ဒီ ကြည့်လို့ရမယ့်
မျက်လုံးဆိုတာက ၂ လုံးပါတယ်
သူ့အပေါ်မှာတော့
မျက်ခုံးမွှေးဆိုတာတွေပါတာပေါ့ဗျာ
မပါရင် အကြည့်ရတယ်ဆိုးသကိုး။

အသက်ရှူဖို့ဆိုပြီး
နှာခေါင်းလို့ခေါ်တဲ့
ရှည်မျောမျော အခေါင်းပေါက်
၂ပေါက်လဲ ပါလေရဲ့။

စားချင်စိတ် ဖြစ်လာရင်
စားရမယ့် ပါးစပ်ပေါက်ကတစ်ပေါက်
သြော် စကားပြောလို့လဲရတယ်လေ။

မေ့တော့မလို့ မေ့တော့မလို့
သူတစ်ပါးပြောစကားတွေ
နားထောင်ဖို့ဆိုပြီး
နားရွက်ဆိုတာလဲ ပါသေးတယ်
ချင့်ချိန်ဖို့က ကိုယ့်တာဝန်လေ။

တစ်ခုချင်းကြည့်ရင် မလှပေမယ့်
အကုန်ပေါင်းစပ်လိုက်ရင်
အဲ့ဒါကို ဦးခေါင်းလို့ခေါ်ကြတယ်။

လူလူချင်းတော့
ကြည့်ပျော် ရှုပျော် ရုပ်ရည်မျိုးရှိတယ်ဗျ
တစ်ခြားကမ္ဘာကတော့ ရုပ်ဆိုးတယ်ပြောမလားပဲ...
အသံကလဲ နားထောင်ကောင်းတယ်ပေါ့ဗျာ။
ထားလိုက်ပါ ထားလိုက်ပါ...

တစ်ခုခု လိုရင် ယူငင်နိုင်အောင်
အသုံးပြုရလွယ်ဖို့ လက်ဆိုတာက
၂ ဖက်ကြီးများတောင် ပါတယ်ဗျ။
ဦးခေါင်းနဲ့ ဆက်သွယ်ဖို့
လည်ပင်းဆိုတာကလဲ လိုအပ်တာပဲ။
အဲ့ဒီကမှ တစ်ဆင့်
ရင်ဘက်
ဝမ်းဗိုက်
ဒီ့ပြင် ဒီ့ပြင့်ဟာတွေ
ပါသေးတယ်ဗျာ
မပြောတော့ဘူးနော...
ခြေထောက်ဆိုတာကတော့
ဟိုနားဒီနား လမ်းသလားလို့ ရတာပေါ့၊
ကျေးဇူးပဲ....

ဒါ့ကြောင့်
ပြောရမယ်ဆိုရင်
လူသတ္တ၀ါတဲ့လေ....

တစ်ချို့တွေက
စိတ်ညစ်တယ် စိတ်ညစ်တယ်...
ညည်းနေလိုက်ကြတာများ
လိပ်ဖြစ်ရင်တောင်
အခွံထူပါတယ်
ပြောကြဦးမယ်။

တယ်ခက်သကိုး
ရတာမလို လိုတာမရနဲ့
အဲ့လိုများပြောလိုက်ရင်
နင်ကရောလူမဟုတ်ဘူးလားလို့
ပြန် လာမေးကြလိမ့်မယ်။

လူတော့ လူပါပဲ
ဒါပေမယ့်
လိုချင်တာတွေ မများ
စိတ်ညစ်မှုတွေ ဘေးဖယ်ထားပြီး
လူပီသအောင် ကြိုးစားနေတဲ့
လူထဲကလူတစ်ယောက်ပါ။
ဒါ့ကြောင့် တစ်ချို့ဆို
ရှိတဲ့ အသက်ထက် တစ်ဝက်လောက်
ငယ်နေတယ်လို့ သမုတ်ကြလေရဲ့။ :P

*****